18+

"Қайырымдылық керуені" бейбіт күннің батырларын іздейді

фото: facebook.com/shymkent.media
14:30, 29 ноября 2022 г.
Общество

Елімізде бесінші рет өткізілетін конкурс туралы БАҚ өкілдеріне баспасөз мәслихатын өткізген Іскер әйелдер қауымдастығының өкілдері айтып берді, деп хабарлайды Шымкент Келбеті Ресми Парақшасы.

Байқауды ҚР Тұңғыш Президенті Нұрсұлтан Назарбаев қоры мен Қазақстанның іскер әйелдер қауымдастығы және КТК телеарнасы ұйымдастыруда.

«Қайырымдылық керуені» конкурсы қайырымдылық істерді жүзеге асыруға, халықтың азаматтық бастамасын жандандыруға және мейірімділік құндылықтарын дәріптеуге бағытталған. Осы байқау арқылы жыл сайын еліміздің дамуына қомақты үлес қосқан, батыл азаматтар мен меценаттар анықталады.

– Мұндай акция арқылы қайырлы істерді жүзеге асыратын, Отан алдындағы азаматтық борышын адал атқарып жүрген мейірімді, әрі батыл жандарды танымал етуді мақсат етеді. Өткен жылы байқауға Шымкент қаласынан 40-қа жуық азамат қатысып, 3-і республикада жеңімпаз атанды. Осындай адамдарды елге дәріптеу арқылы өскелең ұрпақты қайырымдылық пен ізгіліктің жарқын үлгісі арқылы адамгершілік ұстанымына тәрбиелеуге ықпал етпекпіз, - деді Іскер әйелдер қауымдастығының Шымкент қалалық филиалы өкілі Әсем Әділбекова.

Байқауға әлеуметтік, қоғамдық мәселелерді шешуге үлестерін қосатын және қайырымдылық бастамаларды жүзеге асыратын жеке және заңды тұлғалар қатыса алады.

Лауреаттар келесі номинациялар бойынша анықталады:

- «Асар» номинациясы қайырымдылық істері ұлттық салт-дәстүрлерге байланысты тұлғаларды марапаттауға бағытталған;

- «Туған жер» туған жеріне білім, экология мен абаттандыру салаларында көмек көрсетіп жүрген жандарға арналған;

- «Батыл жүрек» номинациясы аясында ерлік көрсеткен, қайсарлық танытқан тұлға марапатталады;

- «Мейірім жолында» номинациясы өз еркімен және өтеусіз көмек көрсететін, қайырымдылық жасайтын жанға табыс етіледі;

- «Қайырымдылық тарихы» номинациясы БАҚ қайырымдылық тақырыптарын үздік жариялайтын, қоғамның назарын әлеуметтік мәселелерге аударатын материалдардың шығуын қамтамасыз ететін журналиске және шығармашыл ұжымға беріледі.

-«Бала жүрегі» номинациясы төтенше жағдайда көрсеткен ерлігі, батылдығы және қайырымдылықты іске қатысқан 6 жастан 18 жасқа дейінгі балалар мен жасөспірімдерге беріледі.

-«Жануарларға мейірім» номинациясы жануарларды қоғайтын, оларды асырауға көмектесетін, жануарлар әлеміне қатысты мейірімділік пен қайырымдылықты насихаттайтын лауреаттарға беріледі.

Конкурсқа қайырымдылық қызметі мемлекеттің қолдауына (мемлекеттік грант, мемлекеттік тапсырыс және т.б.) байланысты кәсіпкерлік субъектілері мен тұлғалар қатыса алмайды.

Байқауға қатысу үшін өтінімді 2022 жылдың 30 желтоқсанына дейін www.fnn.kz және www.buzinesswomen.kz сайттары арқылы беруге болады.

Қайырымдылық керуені